ІІІ ТУРАЎСКІЯ ЕПАРХІЯЛЬНЫЯ АДУКАЦЫЙНЫЯ ЧЫТАННІ
- Падрабязнасці
- Апублікавана 28.10.2016 11:22
26.10 – 27.10.2016 на базе УА МДПУ імя І.П. Шамякіна адбываліся ІІІ Тураўскія епархіяльныя адукацыйныя чытанні на тэму “1917–2017 гг.: праваслаўе ў гісторыі і культуры Беларусі – вопыт стагоддзя”.
Для ўдзелу ў Чытаннях было прадстаўлена 75 дакладаў ад выкладчыкаў і студэнтаў ВНУ Рэспублікі Беларусь (ГДУ імя Ф. Скарыны, МДПУ імя І.П. Шамякіна, БДАТУ, БарДУ, БТЭУВК), запрошаны навучэнцы сярэднеспецыяльных навучальных устаноў і агульнаадукацыйных школ. Асаблівасцю цяперашніх Чытанняў стаў шырокі ўдзел педагогаў школ Гомельскай і Брэсцкай абласцей, г. Мінска.
Удзельнікаў Чытанняў прывітаў прарэктар па навуковай рабоце Наўныка В.М., які адзначыў, што ў нашым універсітэце надаецца вялікая ўвага навукова-даследчай рабоце па вывучэнні гісторыі праваслаўя, духоўнай спадчыны беларускага народа.
Начальнік аддзела адукацыі, спорту і турызму Мазырскага райвыканкама Клепчукова Л.С. у сваім прывітанні выказала надзею на тое, што Мазырскі педагагічны ўніверсітэт, а таксама іншыя навучальныя ўстановы г. Мазыра будуць працягваць актыўнае ўзаемадзеянне з Тураўскай епархіяй па пытаннях духоўна-маральнага выхавання моладзі.
Епіскап Тураўскі і Мазырскі Леанід падкрэсліў важнасць духоўнага складніка ў сучаснай адукацыі.
З пленарнымі дакладамі выступілі Сымановіч Т.М., загадчык кафедры гісторыі і МВГ УА МДПУ імя І.П. Шамякіна, кандыдат педагагічных навук, дацэнт: “Узаемадзеянне ўстаноў адукацыі і Беларускай праваслаўнай Царквы ў духоўна-маральным выхаванні моладзі”; Юрыс С.А., дэкан факультэта давузаўскай падрыхтоўкі і прафарыентацыі ГДТУ імя П.А. Сухога, кандыдат гістарычных навук, дацэнт: “Дзейнасць Гомельскага праваслаўнага брацтва на пачатку ХХ стагоддзя”; Чарапко С.А., загадчык кафедры агульнай гісторыі ГДУ імя Ф. Скарыны, кандыдат гістарычных навук, дацэнт: “Дзейнасць Беларускай Праваслаўнай Царквы ў канцы ХХ – пачатку ХХІ стст. у разрэзе статыстыкі”; Мохарава Н.В., дырэктар ДУА “Гімназія г. Калінкавічы”: “Вынікі рэалізацыі інавацыйнага праекта «Укараненне мадэлі фарміравання аптымістычнага светапогляду навучэнцаў на праваслаўных традыцыях беларускага народа»”.
Работа Чытанняў была арганізавана ў рамках пяці секцый:
– Супрацоўніцтва царквы і дзяржавы;
– Этычная дактрына праваслаўя;
– Палажэнне рускай праваслаўнай царквы ў 1917–2017 гг.;
– Місіянерская і асветніцкая дзейнасць царквы;
– Дашкольная адукацыя.
Завяршылася канферэнцыя выступленнем ансамбля народнага інструментальнага калектыву Мазырскага музычнага каледжа.