Выяздное пасяджэнне Грамадскага рэспубліканскага студэнцкага савета (ГРСС) пры Міністры адукацыі

Падрабязнасці: Апублікавана 26.10.2016 06:27

21–22.10.2016 на базе санаторыя-прафілакторыя Беларускага нацыянальнага тэхнічнага ўніверсітэта “Політэхнік” адбывалася выяздное пасяджэнне Грамадскага рэспубліканскага студэнцкага савета (ГРСС) пры Міністры адукацыі.

Мазырскі дзяржаўны педагагічны ўніверсітэт імя І.П. Шамякіна прадстаўляла Корзун Вікторыя, старшыня студэнцкага самакіравання ўніверсітэта, студэнтка 5 курса факультэта дашкольнай і пачатковай адукацыі.

У рамках мерапрыемства, на якім прысутнічалі студэнты з усіх універсітэтаў Беларусі, прайшлі трэнінгі на камандаўтварэнне і развіццё лідэрскіх якасцей, майстар-класы па развіцці кіраўнічых навыкаў і рабоце ў інфармацыйнай прасторы. Адной з ключавых падзей стала пасяджэнне Дыскусійнага клуба ГРСС з удзелам Міністра адукацыі Міхаіла Жураўкова на тэму “Ці лёгка быць студэнтам?”.

Міхаіл Анатольевіч абмеркаваў са студэнцкім актывам магчымасць рэалізацыі новага рэспубліканскага праекта “Мой універсітэт будучыні”. Ён адзначыў, што мінулы сход ГРСС цудоўна вырашыў сваю задачу. Студэнты рэалізавалі такія праекты, як “Адукацыя вачыма моладзі”, інтэрнет-праект “Пытанне міністру адукацыі”, правялі грамадзянска-патрыятычную акцыю “70 добрых спраў ветэранам”, першую Міжнародную студэнцкую канферэнцыю “Студэнцкае самакіраванне: вопыт і перспектывы развіцця” і інш.

Нагадаем, савет быў арганізаваны з мэтай развіцця студэнцкага самакіравання, заахвочвання студэнцкай моладзі да працэсаў кіравання ўстановай вышэйшай адукацыі, удасканалення форм і метадаў узаемадзеяння студэнцкай моладзі з органамі дзяржаўнага кіравання.