Мозырский государственный педагогический университет имени И.П.Шамякина

Герб УА МДПУ імя І.П. Шамякіна

Падрабязнасці

Апублікавана 04.11.2013 07:50

Геральдычнае апісанне герба. Сімволіка герба

Герб Мазырскага дзяржаўнага педагагічнага ўніверсітэта ўяўляе сабой чатырохкутны, з закругленымі ніжнімі вугламі, завостраны на ўскрайку блакітны геральдычны шчыт з белым контурам па краі, з выявай белага колеру ў выглядзе франтальна разгорнутай кнігі. У развароце кнігі па цэнтры знаходзіцца выява бусла светла-блакітнага колеру. Вакол кнігі – эліпс з растуленым контурам блакітнага колеру, размешчаным на гарызантальнай восі па розныя бакі дзвюма зоркамі. Над эліпсам гарызантальна размешчана залатая (жоўта-аліўкавая) лаўровая галінка. Пад эліпсам размешчаны літары “МДПУ”, якія абазначаюць скарочаную назву ВНУ і словы “імя І.П. Шамякіна”.

Кампазіцыя ўключае выкарыстаны раней знакавы сімвал – “Бусел”, дзеля забеспячэння пераемнасці візуальнага ўспрыняцця сімвала ўніверсітэта.

Значэнне сімвалаў герба

Элементы кампазіцыі

Кніга – традыцыйна з’яўляецца сімвалам вышэйшай адукацыі і выкарыстоўваецца ў Еўрапейскай і Паўночна-Амерыканскай геральдыцы; сімвалізуе асвету, навуку, адукацыю, веды.

Белы (светла-блакітны) бусел – сімвалізуе пільнасць, даўгавечнасць, мудрасць, адданасць, гонар. Выява птушкі з напаўраскрытымі крыламі, якая імкнецца ў вышыню, – сімвал грамадскіх памкненняў. У паўночных краінах яго рэгулярнае вяртанне ўвесну дазваляе разглядваць бусла як увасабленне свята адраджэння. Адлюстраванне бусла звязана таксама і з іншымі сімвалічнымі сэнсамі, напрыклад, з уяўленнямі пра “птушку душы”; кантакт з “водамі тварэння”, адкуль бярэ пачатак усё жывое. Бусел з’яўляецца сімвалам Палесся і, бясспрэчна, адлюстроўвае рэгіянальнае знаходжанне ВНУ.

Эліпс (яйка) – сімвал пачатку ўсяго жывога, надзеі і новага жыцця. У блакітным колеры – форма Зямлі і атмасферы вакол, сімвал інфармацыйных плыняў, якія змяняюць адна адну, развіцця знешніх і ўнутраных сувязей.

Залатая васьміканцовая зорка  – Ружа Вятроў – сімвалізуе аператыўнасць, хуткасць рашэння пастаўленых задач, мэтанакіраванасць; сімвал высокіх памкненняў і ідэалаў.

Лаўровая галінка – непарушнасць, традыцыі, моцная слава, веліч і перамога.

Сімволіка колеру

Блакітны колер – сімвалізуе прыгажосць, веліч, духоўнасць, а таксама развіццё, рух наперад, мару, узвышаныя памкненні.

Золата – сімвалізуе справядлівасць, міласэрнасць і пакору, а таксама багацце, шляхетнасць, самастойнасць.

Срэбра (белы) – геральдычны метал, які выяўляецца белым колерам. Сімвал веры, чысціні, шчырасці, высакароднасці, узаемаразумення.

Чорны колер – сімвал адукаванасці, развагі, сціпласці, сталасці ў выпрабаваннях.

Аўтар герба – ст. выкладчык кафедры выяўленчага мастацтва і графікі Вольга Сяргееўна Дарафеева

Герб быў створаны для афіцыйнай рэгістрацыі дзяржаўнай ВНУ Беларусі