Вясёлка талерантнасці

Падрабязнасці: Апублікавана 27.12.2018 13:01

18 снежня ў Мазырскім дзяржаўным педагагічным універсітэце імя І.П. Шамякіна адбыўся творчы вечар “Вясёлка талерантнасці”, ініцыятарамі правядзення і арганізатарамі якога выступілі актыў Туркменскага зямляцтва сумесна з аддзелам па выхаваўчай рабоце з моладдзю. На свята сабраліся студэнты – прадстаўнікі розных нацыянальнасцей.

У нашым універсітэце навучаюцца студэнты з розных краін далёкага і блізкага замежжа. Для лепшага ўзаемаразумення мы павінны пазнаваць культуру і традыцыі народаў, якія жывуць з намі побач, паколькі культура кожнага народа мае сваю каштоўнасць і ўнікальнасць.

Замежныя навучэнцы з Туркменістана, Узбекістана, Кітая пазнаёмілі нас з традыцыямі, фальклорам сваіх краін і народаў. Беларускія студэнты прэзентавалі беларускую, рускую і ўкраінскую культуры. Усе прысутныя ўбачылі рознакаляровыя фарбы і жанры, вершы і музыку – сапраўдную “вясёлку”.

Свята стала сапраўдным вечарам сяброўства. Напрыканцы мерапрыемства студэнты і выкладчыкі прамовілі разам: “Калі кожны будзе цярпімы да іншага, то разам мы зробім талерантным наш свет!”.