Тыдзень рускага слова, прысвечаны 100-годдзю з дня нараджэння А.І. Салжаніцына

Падрабязнасці: Апублікавана 28.05.2018 06:14

З 15 па 18 мая 2018 г. Цэнтрам русістыкі УА МДПУ імя І.П. Шамякіна на базе філалагічнага факультэта пры падтрымцы Прадстаўніцтва Рассупрацоўніцтва ў Рэспубліцы Беларусь, Расійскага цэнтра навукі і культуры ў Гомелі, Пензенскага дзяржаўнага ўніверсітэта і пры актыўным ўдзеле ўстаноў адукацыі рэгіёна (гімназій, ліцэяў, школ г. Мазыра, г. Калінкавічы, г. Светлагорска) быў рэалізаваны навукова-адукацыйны праект “Тыдзень рускага слова”, прысвечаны 100-годдзю з дня нараджэння рускага пісьменніка, мысляра, грамадскага дзеяча, лаўрэата Нобелеўскай прэміі Аляксандра Ісаевіча Салжаніцына.

З прывітальным словам да студэнтаў, выкладчыкаў, гасцей звярнулася дэкан факультэта Таццяна Мікалаеўна Сымановіч. Яна адзначыла асабліва значную ролю А.І. Салжаніцына ў гісторыі рускай культуры. Сёння творчасць пісьменніка, 100-годдзе якога мы будзем адзначаць 11 снежня 2018 года, паважаюць і любяць ва ўсім свеце. Для сучасных чытачоў слова Салжаніцына вельмі значнае, таму што ў ім утрымліваецца вялікі зарад маральнасці, духоўнасці і патрыятызму.

Асаблівы інтарэс у філолагаў выклікала творчая сустрэча з вядучым навуковым супрацоўнікам Дома рускага замежжа імя А.І. Салжаніцына, кандыдатам гістарычных навук, спецыялістам у галіне гісторыі рускага замежжа Віктарам Уладзіміравічам Леанідавым, вядомым паэтам, аўтарам песень, у тым ліку да кінафільмаў, выканаўцам. У яго выкананні прагучалі вершы і песні, прысвечаныя вядомым імёнам, звязаным з рускім замежжам. Бясспрэчны паэтычны талент, лейтматывам якога прасочваўся боль за лёсы Расіі, у адзінстве з гарманічным музычным суправаджэннем не пакінулі нікога абыякавым. Напрыканцы выступлення Віктар Леанідаў перадаў Цэнтру русістыкі ўніверсітэта дыск са сваімі песнямі.

16 мая адбыўся брэйн-рынг па біяграфіі і творчасці А.І. Салжаніцына (арганізатар – нам. дэкана філалагічнага факультэта, старшы выкладчык Марына Генадзьеўна Лобан). У ім прынялі ўдзел каманды школьнікаў устаноў адукацыі г. Мазыра: “Сярэдняя школа № 1”, “Сярэдняя школа № 8”, “Гімназія імя Янкі Купалы”, “Мазырскі дзяржаўны абласны ліцэй”. Інтэлектуальны турнір быў прысвечаны біяграфіі пісьменніка і творам, якія вывучаюцца ў школе (“Адзін дзень Івана Дзянісавіча”, “Матронін двор”). З дапамогай мультымедыйнай прэзентацыі, падрыхтаванай студэнтамі 3-га курса філалагічнага факультэта спецыяльнасці “Руская мова і літаратура”, удзельнікі брэйн-рынга “перагарталі” старонкі сямейнага альбома А.І. Салжаніцына, гаварылі пра старажытнасць яго роду, асаблівасці “імянайменавання” пісьменніка. Напрыканцы спаборніцтваў старшакласнікі паспрабавалі некаторыя стравы меню “з лагернага жыцця”, правялі конкурс на лепшае пытанне.

17 мая адбылася ўжо традыцыйная 6-я міжуніверсітэцкая алімпіяда па рускай мове сярод замежных студэнтаў, у якой прымалі ўдзел каманды Мазырскага дзяржаўнага педагагічнага ўніверсітэта імя І.П. Шамякіна і Гомельскага дзяржаўнага ўніверсітэта імя Ф. Скарыны.

Алімпіяда праходзіла ў 2 этапы. На першым адборачным этапе патрабавалася напісаць сачыненне, а другі, што адбыўся непасрэдна ў Мазыры, уключаў у сябе выкананне лексіка-граматычнага тэста і выразнае чытанне вершаў на рускай мове.

Замежныя студэнты не толькі пацвердзілі высокі ўзровень валодання рускай мовай, але і прадэманстравалі свае творчыя здольнасці: адным з крытэрыяў ацэнкі чытання вершаў быў артыстызм, а падрыхтаваны ўдзельнікамі алімпіяды невялікі канцэрт стаў сапраўдным упрыгожаннем мерапрыемства.

Прыемна адзначыць, што дыпломам першай ступені была ўзнагароджана студэнтка 3 курса філалагічнага факультэта нашага ўніверсітэта Д. Джумаева.

18 мая адбыўся конкурс “Рыторыка хуткага рэагавання” (па цытатах і афарызмах А.І. Салжаніцына).

У конкурсе прымалі ўдзел студэнты 1, 3 і 4 курсаў філалагічнага факультэта. На мерапрыемстве была прадстаўлена выстава кніг пісьменніка, выступленні канкурсантаў суправаджаліся прэзентацыяй і музычным афармленнем.

Уступнае слова было прысвечана цікавым фактам з жыцця і творчасці А.І. Салжаніцына. Было адзначана, што пасля сябе пісьменнік пакінуў багатую літаратурную спадчыну, многае з напісанага ім яшчэ толькі належыць асэнсаваць. Удзельнікам конкурсу былі прапанаваны вядомыя выказванні і цытаты Аляксандра Салжаніцына, у якіх кожны для сябе здолеў знайсці простыя і адначасова важныя жыццёвыя ісціны.

Вусныя выступленні ўдзельнікаў ацэньваліся журы па наступных крытэрыях: змест выказвання, пабудова выказвання, моўнае афармленне, творчы характар выказвання і адказы на пытанні членаў журы. Падчас падрыхтоўкі канкурсантаў увазе прысутных была прапанавана віктарына, прысвечаная жыццю і творчасці А.І. Салжаніцына. За кожны правільны адказ прысуджаўся адзін бал, той, хто набраў большую колькасць балаў, стаў пераможцам і ў якасці ўзнагароды атрымаў памятны каляндар з выявай партрэта пісьменніка.

У аўдыторыі склалася добразычлівая і творчая атмасфера. Студэнты актыўна адстойвалі свае пазіцыі, аргументавана адказвалі на пытанні журы, прыводзілі многа прыкладаў з мастацкай літаратуры. Па выніках конкурсу дыпломам першай ступені была ўзнагароджана студэнтка 1 курса філалагічнага факультэта (спецыяльнасць “Руская мова і літаратура. Замежная мова (англійская)”) Халмякова Дыяна. Дыплом другой ступені атрымала студэнтка 3 курса філалагічнага факультэта (спецыяльнасць “Руская мова і літаратура”) Катрук Ксенія, дыплом трэцяй ступені атрымала студэнтка 3 курса філалагічнага факультэта (спецыяльнасць “Руская мова і літаратура”) Рафальская Валерыя. Пераможцы таксама атрымалі ў падарунак кнігі, астатнія ўдзельнікі конкурсу былі ўзнагароджаны граматамі.

Конкурс “Рыторыка хуткага рэагавання” прайшоў вельмі цікава і аказаўся карысным як для студэнтаў, так і для выкладчыкаў.

Напрыканцы было адзначана, што асоба Аляксандра Ісаевіча Салжаніцына на сённяшні дзень застаецца адной з самых неадназначных, яркіх і таленавітых, што адлюстравалі ў сабе цэлую эпоху не толькі ў літаратурнай сферы, але і ў жыцці многіх людзей у Расіі і за мяжой. А дзейнасць пісьменніка заўсёды будзе выклікаць цікавасць, дзякуючы таму, што аўтар выказвае ўласную думку, якая прываблівае і будзе прывабліваць як аматараў, так і крытыкаў яго поглядаў і работ пра лёс і далешае развіццё расійскай дзяржавы.

У зборніку, падрыхтаваным па выніках Тыдня рускага слова, змешчаны творчыя работы пераможцаў конкурсаў творчых работ (эсэ, прэзентацый, насценных газет), што адбыліся ў рамках мерапрыемстваў, сцэнарыі некаторых адукацыйна-выхаваўчых мерапрыемстваў, а таксама навуковыя даследаванні, прысвечаныя праблемам мовы і стылю А.І. Салжаніцына. Спадзяемся, што гэтыя матэрыялы будуць карысныя як выкладчыкам, аспірантам і студэнтам, так і настаўнікам-практыкам у іх прафесійнай дзейнасці.

С.Б. Кураш, заг. кафедры беларускай і рускай філалогіі,

М.Г. Лобан, нам. дэкана філалагічнага факультэта,

В.У. Сергушкова, дацэнт кафедры беларускай і рускай філалогіі,

І.Л. Судзібор, нам. дэкана філалагічнага факультэта