Міжнародны навуковы кангрэс “Каштоўнасці, традыцыі і навацыі сучаснага спорту”
- Падрабязнасці
- Апублікавана 02.05.2018 12:23
У Беларускім дзяржаўным універсітэце фізічнай культуры 18–20 красавіка адбыўся Міжнародны навуковы кангрэс “Каштоўнасці, традыцыі і навацыі сучаснага спорту”.
Форум сабраў больш за 500 чалавек з 18 краін: Арменіі, Беларусі, Балгарыі, Грузіі, Казахстана, Кітая, Рэспублікі Карэя, Латвіі, Лівана, Літвы, Малдовы, Польшчы, Расіі, Сербіі, Турцыі, Украіны, Чэхіі і Японіі.
У пленарным пасяджэнні прынялі ўдзел Міністр спорту і турызму Рэспублікі Беларусь Сяргей Міхайлавіч Кавальчук, першы віцэ-прэзідэнт НАК Андрэй Уладзіміравіч Асташэвіч, старшыня Дзяржаўнага камітэту па навуцы і тэхналогіях Рэспублікі Беларусь Аляксандр Генадзьевіч Шумілін, а таксама рэктар БДУФК Сяргей Барысавіч Рэпкін і яго калегі з Расіі і Польшчы.
Кангрэс стаў адкрытай пляцоўкай для абмену вопытам, абмеркавання перспектыў і анансавання вынікаў навуковых даследаванняў па пытаннях развіцця спорту, фізічнай культуры і турызму.
Навуковая і дзелавая праграма кангрэса ўключала даклады-прэзентацыі, майстар-класы, семінары, дыскусійныя пляцоўкі.
Адной з галоўных тэм форума стала развіццё спорту вышэйшых дасягненняў і падрыхтоўка спартыўнага рэзерву. Эксперты абмеркавалі актуальныя праблемы спартыўнага адбору, сістэму падрыхтоўкі атлетаў і трэнераў, медыка-біялагічныя і біямеханічныя аспекты спартыўнай дзейнасці.
Таксама дыскусійныя пляцоўкі закранулі тэмы алімпійскай адукацыі, фізічнай культуры і здароўя, сучасных тэхналогій у індустрыі турызму і гасціннасці.
Мадэратарам секцыі “Фізічная культура ў сістэме адукацыі” з’яўляецца дацэнт кафедры тэорыі і методыкі фізічнага выхавання Мазырскага дзяржаўнага педагагічнага ўніверсітэта імя І.П. Шамякіна, кандыдат педагагічных навук Вячаслаў Аляксандравіч Гаравы.
Вячаслаў Аляксандравіч выступіў таксама з дакладам на тэму “Матывы студэнтаў да заняткаў фізічнай культурай”.
Асобная секцыя была прысвечана менеджменту, маркетынгу і эканоміцы спорту.