Рэалізацыя праграмы акадэмічнай мабільнасці выкладчыкаў

Падрабязнасці: Апублікавана 15.12.2016 12:30

У рамках рэалізацыі праграм міжвузаўскай акадэмічнай мабільнасці студэнты і супрацоўнікі УА МДПУ імя І.П. Шамякіна з 13 па 15 снежня 2016 атрымалі ўнікальную магчымасць паслухаць лекцыі і наведаць практычныя заняткі Башкіравай Таццяны Валянцінаўны, доктара біялагічных навук, прафесара кафедры агульнай псіхалогіі, намесніка дырэктара па навуцы і міжнародным сувязям інстытута псіхалогіі, педагогікі і сацыяльнай работы Федэральнай дзяржаўнай бюджэтнай адукацыйнай установы вышэйшай адукацыі “Разанскі дзяржаўны ўніверсітэт імя С.А. Ясеніна” (Расія).

Башкірава Т.В. мае больш за 150 навуковых і навукова-метадычных публікацый, 4 манаграфіі, 7 вучэбных і вучэбна-метадычных дапаможнікаў, лаўрэат некалькіх конкурсаў навуковых работ. Сертыфікавана па праблемах адаптацыі, гіпаксіі, фізічных нагрузках, хронабіялогіі, біягеахімічнай экалогіі і інш. Башкірава Т.В. – распрацоўшчык і выканаўца грантаў РДНФ: № 05-06-53601 а/Ц “Сацыяльнае здароўе дзяцей і навучэнцаў як этнапсіхафізіялагічная праблема ў розных адукацыйных сістэмах Разанскага рэгіёну”; № 07-06-53404 а/Ц “Псіхалагічныя асаблівасці работнікаў вытворчасці ў сістэме прафілактыкі тэхнагенных катастроф” і інш. Сумесная навукова-даследчая дзейнасць Т.В. Башкіравай і супрацоўнікаў кафедры педагогікі і псіхалогіі нашага ўніверсітэта ў рамках праграмы еўрапейскага праекта “Падрыхтоўка педагогаў і адукацыйных менеджэраў да работы з гетэрагеннымі групамі і арганізацыямі” (543873-TEMPUS-1-2013- TEMPUS-JPCR) паспрыяла далейшаму развіццю міжнародных сувязей.

Нашым студэнтам Таццяна Валянцінаўна прапанавала спецкурс, заснаваны на выніках шматгадовых тэарэтычных і практычных даследаванняў у галіне псіхадыягностыкі, развіцця і навучання адораных навучэнцаў. Вялікі інтарэс выклікала новая апаратна-праграмная індывідуальная псіхафізіялагічная дыягностыка, магчымасці якой прадэманстравала Т.В. Башкірава.

Кафедра педагогікі і псіхалогіі ад імя ўсіх студэнтаў і супрацоўнікаў выказвае ўдзячнасць Таццяне Валянцінаўне і спадзяецца на новыя сустрэчы.